في البداية احب اقولكم ان دي كلها ازواق و بتختلف من شخص لاخر ، ولكن نحن نقدم لكي هذا لكي نساعدك علي الاختيار الصحيح .
نبدا بالارضيات :
الارضيات فية منها انواع كتيييييييييير فية سيراميك وفية رخام وفية طوب حجرى وفية قيشانى و باركية وفية انواع لا حصر لها بس هانتكلم عن طرق تنظيمها انا مش هاتكلم عن كل الانواع هاتكلم بس عن المنتشر فى مصر وهانتكلم عن السيراميك لان باقى المواد زى الرخام والبلاط اللوانها بتكون محدودة جدااا ومش محتاجة كلام عنها .
نبدا
السيراميك :
مميزاتة : سعرة فى متناول كتيير من الناس واللوانة متعددة ولية بريق بيعيش مع الزمان ومش محتاج عناية خاصة زى الرخام مثلا
عيوبة : ممكن يتكسر لو وقعت علية حاجة تقيلة ومينفعش ندخل معاة نوع تانى من الارضيات (يعنى الرخام ممكن ندخل معاة الحجر ) .
طرق تنظيمة
لو هايتحط فى المدخل : نختار الالون الفاتحة علشان نبين المدخل واسع ونظيف
ومن الالون المفضلة فى المداخل هى البيج وسن الفيل والبنى الفاتح والاخضر الرخامى الفاتح وياريت نبعد عن الالوان الغامقة والى التراب بيبان جدااااااااااا فيها يعنى مانختارش لون كحلى او اسود لاننا هانضطر ننظفة يوميا تقريبا
فى صالة المعيشة : لازم الاول نشوف الموبيليا الى هاتتحط نوعها اية كلاسيكى ولا مودرن
لو كلاسيك يبقى نبعد عن الالوان الفاقعة والمميزة باللمعان ممكن الوان ترابية او الوان هادية زى البيج او السيمون والافضل اننا نختار الالوان الرخامية زى الاخضر الرخامى والبنى الرخامى والاصفر الرخامى
اما لو مودرن فهنختار الالون حسب لون الاثاث ونختار عكسة
يعنى لو الاثاث لونة اسود يبقى نختار لون فاتح زى الابيض او الدهبى او البيج اللميع
لو الاثاث لونة فضى (لون النيكل والكروم ) يبقى نختار لون لية انعكاسات حلوة مع الفضى زى النبيتى او الموف او الازرق او الاحمر ونبعد عن الالوان الرخامية والالوان الفاتحة اوى
فى غرفة النوم: هانختار الالوان الخشبية يعنى درجات البنى ودرجات الالوان الترابية
لانها هاتتناسب مع كل الاذواق
فى المطبخ : طبعا لو المطبخ نظام عربى (يعنى مقفول ) هانختار الالوان الهادية جدااا زى الموف الفاتح او درجات البنى اما لو المطبخ نظام امريكى (يعنى مفتوح على الصالة ) هانختار اللوان تتناسب مع اللوان الصالة
فى الحمام : فية ناس كتيير بتحب تختار اللوان غامقة فى الحمام وخاصة فى الارضيات بس المفضل انة فى الحمام تكون الالون فاتحة فى الارضيات والحوائط تكون الالون ممزوجة بين لون الارضيات ولون غامق متناسب معاها
فى الحديقة : طبعا فية انواع مخصوصة للحدائق يعنى ماتكونش ناعمة لا بتكون فيها فراغات علشان تصرف المياة وطبعا فى الحدائق لازم نختار اللوان ترابية ونبعد عن اللوان الفاقعة علشان نمزج بين الطبيعة والاناقة بشكل سليم وحضارى
فى السلم : طبعا هانختار على حسب لون المدخل ويكون لون السلم لون فاتح ونبعد عن الالوان الغامقة لانها مش هاتكون حلوة بالليل لاننا عاوزين لون يعكس الاضائة مش يمتصة
دلوقتى هانتكلم بالنسبة للحوائط :
اللوان الحوائط ليها درجات كتيييييييير جدااااا وانواع كتيير من ورق الحوائط واذواق مختلفة ف هانتكلم عنها من خلال بعض النصائح :
1- ماتعملش لون الغرفة او الصالة كلها لون واحد غامق لانة هايحسسك بعدم الراحة ممكن تعمل جزء صغير بلون غامق والباقى لون فاتح من درجات اللون الغامق يعنى زى البيج والبنى او السيمون والاحمر زى الموف الفاتح والازرق او الموف الغامق وهكذا
2- اختار الالوان بالنسبة للاثاث لو مودرن اختار لون مميز واخلطة بلون عادى زى مثلا البيج والنبيتى او الابيض والزرق او الاخضر التفاحى والبنى الشيكولاتة وهكذا
3- لو الاثاث كلاسيك اختار لو قديم زى البنى ودرجاتة او النحاسى ودرجاتة وهكذا
4- لو مساحة الغرفة كبيرة اختار لون غامق شوية علشان يبين حدودها
5- لو المساحة صغيرة اختار لون فاتح علشان يخفى حدودها وتبان واسعة
6- لو الغرفة بتدخلها اشعة الشمس بكثافة اختار لون مطفى بدون لمعة
7- لو الغرفة بعيدة عن الشمس اختار لون فية لمعة علشان تدى احساس بالاضائة
8- السقف مش لازم يكون ابيض ممكن يتعمل لون خفيف وبتأثيرات كتيير و في حاجات حلوة كتير
9- نصيحة اخيرة حاولوا يكون فية تناسق بين لون الارضيات مع الحوائط مع الموبيليا مع الاضائة
نتكلم شوية عن الاثاث :
طبعا احنا قولنا ان فية نوعين (المودرن والكلاسيك)
هانتكلم عنهم فى شوية نصائح
1- ايااااااااااك وانك تختار حاجة مودرن مع كلاسيك فى نفس المكان يعنى مثلا
الصالون كلاسيك والسفرة مودرن الى هايشوفهم هايحس انة داخل معرض موبيليا مش بيت
2- كمان انا باشوف ناس حاطة مع الانترية الكلاسيك تلفزيون lcd متعلق على الحيط دة بيكون شكلة باااااايخ موت لانة كدة حط حاجة موديرن مع حاجة كلاسيك او كاسيت سى دى جديد مع حاجة كلاسيك
3- فية موضة حلوة طالعة اليومين دول فى الانتريهات وهى انك بدل ماتجيب طقم مكون من كنبة و4 كراسى لا انت ممكن تجيب 3 كنبات بس او 4 فوتيهات بس او كنبة وفوتيهين (طبعا من نفس التصميم يعنى مش كنبة حمرا والتانية صفراء كدة تبقى علبة الوان مش صالة ) (الفوتية هوة نفس الكنبة بس صغير لفردين بس) الموضوع دة حلو اوى فى المودرن
4- وياريت نحط مع الانترية سجادة صغيرة فى الوسط متناسقة مع لون الانترية وفوق السجادة الصغيرة ترابيزة الانترية
5- وطبعا مع الانترية هانحط ترابيزة صغيرة للتلفزيون شكلها شيك ولونها متناسق مع الانترية وياريت بلاش المكتبة الكبيرة لان موضتها انتهت تقريبا
6- اما بالنسبة للسفرة فى انواااااااااع كتيير بس احنا نختار على حسب الزوق والمكان يعنى لو السفرة فى اوضة مستقلة ممكن نجيبها موديرن او كلاسيك لانها مش هاتبقى جنب حاجة مغايرة لنوعها
7- وكمان فية غلطة صغيرة بس بايخة موووووووووووت وهيا انك تكون جايب سفرة كلاسيك بس لما تعمل عزومة تقدم للناس اطباق موديرن احمر واخضر ورسومات حديثة وكدة دى غلطة شنيييييييييييييعة (زى الى بيجيب عربية محترمة جدااا ويحط عليها جملة من جمل الميكروباص الشهيرة) ....المهم لو السفرة مودرن هانختار الاطباق والصوانى موديرن واللوان جديدة اما لو كلاسيك هانختار الاطباق الصينى القديمة الى عليها رسومات ورود وهكذاا
8- اوض النوم فية منها اشكال واللوان بس احنا لازم نختار حاجة متناسقة مع بعض ومش لازم نجيب اطقم مثلا ممكن نجيب سرير ابيض مع دولاب لبنى فاتح وكدة احنا ممكن ننسق الالوان الى احنا بنحبها دة للمودرن اما للكلاسيك نجيب اطقم كاملة احسن لاننا مش هانعرف ننسق الكلاسيك مع بعض
نتكلم بقا شوية عن الاضائة :
1- برضو نخلى بلنا كويس ان لو الاوضة كلاسيك يبقى نختار النجف والابليكات والاباجورات حاجات كلاسيك والوانها قديمة زى النحاسى والدهبى وهكذاااا
اما لو مودرن نختار الوان النجف والاباجوارات اللوان زى الاحمر والاسود وهكذااا
2- ممكن نجيب النجف الى بيكون فية كريستال بس بدون معدن دة بيبقى حلو اوى فى الموديرن والكلاسيك
3-ناخد بالنا من لون الاضائة نفسها يعنى لو المكان كلاسيك نجيب اللمبات الى بتدى اضائة صفراء (الى هيا القديمة ) علشان تدى تعتيق للاثاث والالوان اما لو المكان موديرن نختار الاضائة البيضاء زى اللمبات الفلوروسنت او النيون او الموفرة للطاقة علشان الاضائة البيضة بتبين درجات الالون المودرن
4- لو المكان او الغرفة ضيقة يبقى نحط الاباجورة او مصدر الاضائة فى النص علشان نخلى الحدود مظلمة وماتبانش بانها صغيرة
5- لو الغرفة كبيرة هانحط الاضائة فى حدود الغرفة علشان نبين الوسع الداخلى للغرفة
6- حاجة تانية لازم ناخد بالنا منها وهى ارتفاع الاضائة لو الغرفة كلاسيك هانحط الاضائة منخفضة زى الاباجورات علشان نزود مساحة الظل اما لو مودرن هانحطها فى السقف علشان توزع الاضائة بشكل واسع
اممممممم نتكلم برضة عن الديكورات والانتيكات شوية :
1- اولا انا مش هاتكلم عن التماثيل لان فية ناس بتقول حرام وناس بتقول حلال فبلاش منها
2- لو هانحط حاجة فى غرفة المعيشة الموديرن يبقى كفاية اوى اننا نحط كاسيت سى دى او تلفزيون lcd او اى جهاز شكلة جديد وبلاش التماثيل والحاجات دى فى المودرن
3- لو هانحط حاجة فى غرفة المعيشة الكلاسيك يبقى كفاية اوى شمعدان نحاسى او فازة قديمة (ملحوظة اننا مانحطش فيها ورد خالص) لو ابجورة قديمة او جهاز راديو قديم او كدة
4- لو المكان سفرة موديرن هايبقى كفاية اوى اننا نحط صور نعلقها على الحيط ويكون بروازها شكلة موديرن مش خشب ولا حاجة وممكن نحط صور لانواع من الاكل والبسكوت والشيكولاتة والقهوة او حاجة تفتح النفس
5- لو المكان سفرة كلاسيك يبقى كفاية اوى اننا نحط صور ببرواز قديم ل منظر طبيعى او صورة عائلية قديمة وهكذا
6- لو غرفة النوم يبقى كفاية اوى اننا نحط صورة شخصية بس الى هايفرق هوة البرواز لو كلاسيك يبقى برواز خشبى اما لو موديرن يبقى البرواز بلاستيك ولونة مميز
تقريبا كدة خلصنا البيت من جوة (انا ما اتكلمتش عن تنظيم الحمامات والمطابخ لانها بتتنظم على حسب ما الزوجة متعودة )
نتكلم عن المساحات الخارجية شوية :
المساحات الخارجية ممكن تكون بلكونة او حديقة انا هاتكلم عن البلكونة بس لان الحديقة موضوعها كبير اوى وعاوزة مهندس زراعة مش مهندس ديكور (خلى بالكم من النقطة دى )
1-الوان الحوائط للبلكونات لازم تكون الوان هادية وقريبة من لون الواجة ويفضل انها تتعمل طوب حرارى علشان تستحمل عوامل الطقس
2- انا بافضل ان البلكونة يكون فيها ستارة علشان نمنع نظرات المتطفلين وخاصة لو فية سيدات والاحسن ان لون الستارة يكون لون ترابى علشان التراب والغبار وعوادم السيارات وكمان بتحمى الاثاث الى فى البلكونة من اشعة الشمس
3- لو البلكونة كبيرة ممكن نحط فيها ترابيزة صغيرة وكرسيين ولا حاجة بتنفع فى القعدة بالليل والفطار الصبح بتبقى لذيذة اوى وفى وجود ضيوف بتبقى متنفس جمييل
4- لو البلكونة صغيرة يبقى كفاية اننا نحط حوض زرع صغير ونحط فية نبات عطرى صغير زى النعناع او الريحان الحكاية دى بتنفع اوى لما يكون عندك مكيف فى البلكونة بدل ما ينقط عند الجيران خلية ينقط للزرع احسن
4- والاضائة فى البلكونات ياريت تكون حاجة خفيفة علشان ماتكونش ملفتة للانظار
و اخيرا نتمني ان تكوني استفتي من هذا الموضوع الشيق الجميل .
طب ازاى تحدد اماكن الغرف و تفصل فراغات المعيشة عن فراغات الاستقبال ؟
اذا كان باب الشقة يقع فى منتصف الشقة يفضل ان يراعى الاتى
فصل فراغات الاستقبال فى اتجاه و فراغات المعيشة فى اتجاه اخر
تكون السفرة هى الاقرب لفراغات المعيشة لإمكانية فصلها عن الاستقبال
يفضل ان يكون الحمام هو الاقرب لفراغات الاستقبال ثم المطبخ
اذا كان باب الشقة يقع فى اول الشقة
يفضل ان تكون اقرب الفراغات للباب هى الصالون ثم السفرة ثم الحمام و المطبخ ثم فراغات المعيشة
لا يفضل وضع باب الحمام او المطبخ على فراغ غرفة المعيشة .
تجنب الغرف المطلة على المناور قدر الامكان للحصول على تهوية طبيعية و لدخول اشعة الشمس .
فى حالة ضرورة وجود احد الغرف او كلها على مناور , يفضل وضع ابوابها على فراغ ذو تهوية طبيعبة مثل ممر توزيع او غرفة المعيشة
كيفية التعامل مع كل فراغ ,وهل هو في حاجة للتعديل ولا لأ ؟
وهنا هنتعرف علي حجم قطع الاثاث والموبيليا المتوقع تواجدها في كل فراغ وبناء عليه هنعرف الحد الادني والمتوسط لكل غرفة . فإذا كانت الغرفة اقل من الحد الادني هنا التعديل هيكون ضرورة
غرفة النوم :
غرفة نوم رئيسية :
سرير: لا تقل ابعاد السرير عن : العرض 1.8 م والطول 1.8م أو 2.00 م , و يفضل ان يزيد طول السرير عن طول الشخص اللي هينام عليه ب 255 سم
الدولاب : غالبا بيتكون 6 ضلفات العرض 2.4 م و الطول او العمق ثابت وهو 60 سم
السراحة : العرض من 1.2 م الي 1.6 م و لا يقل العمق عن 50 سم . و العمق الطبيعي هو 60 سم
الكومود : لا يقل عن طول 40 و عرض 40 ، و المعتاد طول 50 وعرض 50
اقل مساحة لغرفة نوم رئيسية
الحد الادني لغرفة نوم رئيسية بسراحة : 3.2 * 3.8
المتوسط 4 م * 4 م ، اكبر من ذلك لا يوجد أى مشكلة
وفي حالة صغر المساحة يمكننا التخلي عن السراحة واستغلالها في غرفة اخري وعليه هتكون مساحة
غرفة نوم رئيسية بدون سراحة : 3.2 م * 2.6 م
غرفة نوم اطفال
سرير : لا يقل عرض السرير عن 90 سم , و طوله عن 1.8 م , و يفضل ان يزيد طول السرير عن طول الشخص اللي هينام عليه ب 25 سم
الدولاب : العرض من 1.2 م الي 1.8 م والعمق ثابت وهو 60 سم
السراحة : العرض من 80 سم الي 1 م و لا يقل العمق عن 50 سم . و العمق الطبيعي هو 60 سم
الكومود : لا يقل عن 40 سم * 40 سم ، و المعتاد 50 سم * 50 سم
اقل مساحة لغرفة نوم اطفال
غرفة نوم لفرد واحد بمكتب : 3 م * 2.7 م
المتوسط 4 م * 4 م ، أكبر من ذلك لا يوجد مشكلة 
نقاط هامة لتوزيع فرش غرفة النوم المستطيلة :
لنفترض ان الشكل الطبيعى للغرفة هو غرفة مستطيلة بها باب و شباك
لا يوضع السرير او الدولاب او السراحة ابدا في نفس الحائط مع الشباك , لذا يتم تخصيص الحائط الموجود به الشباك للكومود او كممر بالغرفة
لا يفضل وضع السرير فى الضلع المواجه للشباك , و ذلك لتجنب شدة الاضاءة صباحا , او للخصوصية عند الرغبة فى فتح الشباك
يفضل وضع الدولاب بين ثلاث حوائط بحيث يغطى اضلاعه الثلاث و حتى لا يمثل جانب الدولاب سدا عند الدخول من باب الغرفة , لذا نحاول ان امكن ان نظهر وجه الدولاب فقط
الصالون و غرفة المعيشة :
في اغلب الاحيان بتكون مقاسات قطع الفرش في الصالون نفس مقاسات غرفة المعيشة
مقاسات الفرش :
فوتيه او كرسي صالون: 70 سم * 70 سم تقريبا , و يزداد غالبا حسب المصنع .
كنبة 2 فرد : 120 سم * 70 سم تقريبا
كنبة 3 فرد : 160 سم * 70 سم تفريبا
طاولة جانبية : 40 سم * 40 سم او اكثر
اقل مساحة للصالون او المعيشة :
لايوجد مساحة معينة , فهو يعتمد على ما تريد فرشه , او امكانيات المساحة عندك , فبعض الناس قد يكتفى بكنبة و كرسى فقط , و لكن عامة , فراغ بطول 3.50 م و عرض 3.00 يكفى لصالون او غرفة معيشة لـ 4 اشخاص و مكان لوضع تليفزيون ، المتوسط 4 م * 4 م اكثر من ذلك لا يوجد اي مشكلة .
نقاط هامة لتوزيع فرش الصالون و المعيشة :
يفضل عدم سد مدخل البلكونه بالكنبة الا عند الضرورة
Lاستغلال المساحة فى كورنر الفراغ ان امكن بوضع ترابيزة جانبية او كنبة حرف
وضع ترابيزة جانبية بجانب كل وحدة فرش ان امكن و ترابيزة اخرى فى منتصف الفراغ .
لا يقتصر فرشك على الاساسيات , حاول ان تجد مكانا لعناصر جمالية و نباتية فى الفراغ .
عدم وضع التلفزيون فى مواجهة الشباك حتى لا يزعجك انعكاس الاضاءة عند المشاهدة
السفرة :
مقاسات الفرش :
سفرة لـ 4 اشخاص بالكراسى حولها : 1.25 م عرض و 1.6 م طول .
سفرة لـ 6 اشخاص بالكراسى حولها : 1.25 م عرض و 1.85 م طول .
سفرة لـ 8 اشخاص بالكراسى حولها : 1.25 م عرض و 2.5 م طول .
النيش او دولاب الهدايا : اقل عرض هو 1.2 و اقل عمق هو 50 سم .
اقل مساحة للسفرة :
تختلف بإختلاف عدد الافراد المطلوب , و لكن عامة , المساحة التى تحتاجها السفرة هى :
الطول : طول ترابيزة السفرة المطلوبة + 60 سم على الاقل لحركة الاشخاص
العرض : عرض ترابيزة السفرة المطلوبة + 60 سم عرض النيش +60 سم للحركة لكل كرسي يقع علي طرفي السفرة يعني 1.2 م , اى ما يساوى 3.00م تقريبا .
المطبخ :
المطبخ من اهم فراغات البيت لان ست البيت تقضي فيه وقت كبير من اليوم وكمان لانه بيحتوي علي عدد كبير من الاجهزة والدواليب وعلشان كدة لازم نهتم واحنا بنفرش المطبخ للوصول الي افضل استغلال للمساحة وتوفير مساحه مناسبه للعمل داخل المطبخ
مقاسات اصغر اجهزة و فرش:
البوتاجاز : 60 سم * 60 سم بارتفاع 85 سم .
الثلاجة : 70 سم * 70 سم بارتفاع 1.4 متر .
غسالة الملابس : عرض 65 سم و عمق 65 سم و بارتفاع 85 سم .
غسالة الاطباق : عرض 60 سم و عمق 55 سم بارتفاع 65 سم
حوض حلة واحدة : 45 سم * 45 سم .
عرض رخامة المطبخ : 60 سم .
اقل مساحة للمطبخ :
يعتبر مطبخ بمساحه 3 م ( 1.5 م * 2 م ) أو أكبر مناسب لوضع البوتجاز و الثلاجه و غساله الملابس و الحوض بشرط الا يقل طول اصغر ضلع فى المطبخ عن 1.5 م 
نقاط هامة لتوزيع الاجهزة فى المطبخ :
يفضل وضع البوتاجاز عند اقرب مكان للشباك لسحب الادخنة مباشرة.
(wet working area ) وضع غسالة الملابس و غسالة الاطباق بجانب الحوض , حيث تسمى هذه المنطقة بمنطقة الاعمال المبللة
( preparation area ) كما يوفر هذا مساحة على الرخامة بجانب الحوض لتقطيع و تحضير الطعام و تسمى هذه بمنطقة التحضير .
يتم وضع الثلاجة فى اى مكان حسب الرغبة , و لكن يفضل قربها لمنطقة التحضير .
يتم استغلال باقى المساحة لعمل دواليب و ادراج للتخزين .
الحمام :
مقاسات فرش الحمام :
المرحاض: عرض 40 سم و طول 70 سم .
اصغر حوض 45 سم * 45 سم تفريبا .
بانيو قدم : 80 سم * 80 سم .
بانيو عادى : عرض 70 سم و طول يبدأ من 1.05 م حتى 2 م تقريبا .
عرض رخامة الحوض ان وجدت , يمكن ان تبدأ ب 40 سم للحوض البارز , و المعتاد هو عرض 60 سم .
اقل مساحة حمام :
اقل حمام ببانيو قدم : 1.5 م * 1.2 م
اقل حمام ببانيو عادى : 1.7 م * 2.25 م
اقل حمام بدون بانيو ( حمام الضيوف ) : 1.6 م * 0.86 م
نقاط هامة لتوزيع الاجهزة فى الحمام :
غالبا ما يكون مكان المرحاض محدد و ثابت لارتباطه بصرف العقار , و تغييرمكانه قد يكون صعبا , و ان كان هناك امكانيه لتغيير مكانه فيفضل ان يكون اسفل او بجانب الشباك للحصول على افضل تهوية .
يفضل من ناحيه التصميم ان يكون الحوض هو اول جهاز تواجهه عند دخول الحمام لأنه اكثرها استخداما و تقبلا فى حالة ترك باب الحمام مفتوح لك أو لضيوفك
يجب الا تقل المسافة بين منتصف المرحاض و الحائط المجاور عن 40 سم .
يفضل بُعد البانيو عن المرحاض قدر الامكان و ذلك لراحة المستخدم عند الاستحمام .
وبكدة تقدر تعمل رسم كروكي لشقتك والموضوع مش هيكلفك اكتر من ورقة وقلم وشوية وقت ، وهيوفر عليك تعب الفرش ومفاجأته .كل التوفيق في امتلاك شقة جميلة
تعليقات
إرسال تعليق